Horch,
da singt oana a Liad! Woher kenn i dees Liad? Wars gestern?
Wars vor langer Zeit? Dees hab i doch scho ghört! Woher
kenn i dees Liad? Warum laßt mir dees jetzt koa Ruah? Wer
is dees, der da singt? Und wer hört außer mir no zua?
War dees net in de sechzger Jahr a Liad gegan Kriag? A
Liad dees lauter Fragen vor dir aufwirft wiaran Berg? Und
jetzt, mei Freund, horch aufn Wind! Der möcht endlich
Antwort gebn! Du moanst du hörst bloß zua, dabei
hörst dei eigne Stimm!
Vielleicht
wars bloß a Klöpfel-Liad, dees d'Kinder gsunga habn.
Vielleicht hats bei dir o'klopft, du woaßt bloß
nimmer, wann. Vielleicht klopfts heut zum dritten Mal. Wer
kanntn dees bloß sei? Aber statt daßd' aufmachst
schoitsd' dein Fernseher ei.
Vergeßn is de Stimm im
Wind. Vergeßn is des Liad. Du schenkst dir no a Hoibe
ei, dee macht di so schee miad, und moanst, daß's in
der Welt wia in der Tagesschau zuageht: Du moanst, du
schaugst bloß zua, derweil spuist selba mit.
Mia
lebn in oana Welt, mei Freund, und mia ghörn alle z'samm,
aa wenns dort, in Anderland, scho wieder gmetzelt habn! Und
grad wenn dort, in Anderstadt, a Kind verschachert werd,
schaltst du dein' Kanal um, ferngsteuert, wia si's ghört.
Magstas net zerschmeißn, dei magische Latern?
Merkst denn net, wia deine Tag bloß immer kürzer
werdn? Magstn net zerschmeißn, dein falschen Hausaltar?
Wennst dann halbert tot bist, woaßt wer dee Gottheit
war!
Nacht
werds. In de Fenster siehgstas flimmern, nah und fern. I fahr
mitm Radl hoam, über mir de Stern. In de Häuser san
vui tausend z'friedn mit eahnam Brei aus action news, fun,
sex and crime. Vui tausend schlaffan ei.
Doch horch: da
singt oana a Liad! Woher kenn i dees Liad? Wars gestern? Wars
vor langer Zeit? Dees hab i doch scho ghört! Woher kenn
i dees Liad? Warum laßt mir dees jetzt koa Ruah? Wer is
dees, der da singt? Und wer hört aßer mir no zua?
|