langelieder > Ernst Weeber

Druckversion (PDF)




Kanapee (Morgn kimmt mei Braut)
Text: Ernst Weeber (1991) sehr frei nach Bob Dylan; Melodie: Bob Dylan, You Ain‘t Goin‘Nowhere


Renga tuats, mei Kopf is schwaar,
‘s Heizöl is alle, der Kühlschrank is laar.
Irgendwia hab i mir den Tag heut versaut.
Aber morgn kimmt mei Braut!

Morgn is‘s endlich soweit: morgn kimmt mei Braut, morgn hats Zeit!
Dann setzma uns mitanander zum Tee – aufs Kanapee.

S Telefon is tot, ‘s Auto verreckt;
der Postbot kimmt und bringt aan Prospekt.
Heut hat si bei mir der Frust ogstaut.
Aber morgn kimmt mei Braut!

Morgn is‘s endlich soweit: morgn is Freitag, da hats Zeit!
Da werds gmüatlich werdn und schee – aufm Kanapee.

I möcht ma was kauffa. Was brauch i denn bloß?
Mir fehlt doch irgendwas! Was isn mit mir los?
Irgendwas hab i heut net richtig verdaut.
Aber morgn kimmt mei Braut!

Morgn is‘s endlich soweit: morgn kimmt mei Braut, morgn hats Zeit!
Dann werds ma garantiert wieder besser geh – aufm Kanapee.

I kauf ma Socken im Schlußverkauf
und a T-Shirt mit der Tina Turner vorn drauf.
Aan Kreislauf hats ma heut aa scho zammghaut.
Aber morgn kimmt mei Braut!

Morgn is‘s endlich soweit! I frag mi wias ausschaut nach so langer Zeit.
Jedenfalls werds morgn lustig zuageh – aufm Kanapee.

Am Bahnhof kauf i ma a Currywurst,
dreißg Ferrero-Küsschen und a Weißbier gegan Durst.
Heut werd oiß im Steh einighaut.
Aber morgn kimmt mei Braut!

Morgn is‘s endlich soweit: morgn kimmts, und dann eß ma gscheit!
Morgn laß mas uns aber wirklich guat geh – aufm Kanapee.

I kauf a Buach aus der Reihe Esoterik übern Sinn
und Zweck von meim Lebn und wer i überhaupt bin.
Aan Bildband über d‘Madonna hab i mir aa no ogschaut.
Aber morgn kimmt mei Braut!

Morgn is‘s endlich soweit: morg kimmts, morgn hats Zeit!
Dann werd si so manches von selber versteh – aufm Kanapee.

Im Fernsehn kimmt der Kriag, und dann kimmt der Sport,
und dazwischen muaß i dringend aufn Abort.
Heut hätt i mir beinah d‘Lindenstraß ogschaut.
Aber morgn kimmt mei Braut!

Morgn is‘s endlich soweit: morgn von drei bis fünfe, da hats Zeit!
Auwei, dee Zeit werd schnell vergeh – aufm Kanapee.

Aber morgn is‘s endlich soweit: morgn kimmt mei Braut, morgn hats Zeit.
Und dee hat dann gwiß de rettende Idee – aufm Kanapee.